गुंजारव

प्रेरणे, देऊ तुला चावी कशी ?

पूर्णता कवितेस लाभावी कशी ?


स्वच्छ कागद गाठतो शत्रूपरी

अक्षरांची खिंड लढवावी कशी ?


वादळी लाटांप्रमाणे कल्पना

शब्दनौका त्यात हाकावी कशी ?


काय वांझोट्या विचारांचे करू ?

लेखणीची कूस उजवावी कशी ?


नांगरूही वाळवंटाला अम्ही

अमृताची धार वर्षावी कशी ?


आतला लेखक कधीचा संपला

शारदेची अर्चना व्हावी कशी ?


मूक हो अन्‌ वैखरीला दे रजा

हाक कानी त्याविना यावी कशी ?