गुंजारव

जातो तिथे कपाटे उघडून पाहतो मी

ग्रंथांविना घराला शो-रूम मानतो मी



वाटेत माणसाचे माणूसपण हरवले

उत्क्रांतवाद कोठे चुकला, तपासतो मी



बांधून ठेवणारे विरलेत सर्व धागे

तुटलेपणा मनांचा शब्दात ओवतो मी



शिकलो नव्या जगाचे रीती-रिवाज मीही

सोयीनुसार जवळी येतो, दुरावतो मी



हिंदूपणास जपतो, मी संस्कृतीस जपतो

(तोरण सणासुदीला दारास लावतो मी!)



वरदान शारदेचे, की शाप हे कळेना

हरपून भान कागद दिन-रात नासतो मी