गुंजारव

मान्य की दुर्बोधतेचा शाप आहे
वस्त्र पद्याचे परी किनखाप आहे

राखले ईमान आहे प्रेरणेशी
काव्यनिष्ठेचे दुजे का माप आहे ?

शब्द दिमतीला उभे असतात माझ्या
काय गतजन्मातले हे पाप आहे ?

शब्द सोपे, अर्थ सोपे मागता पण
राहिले जीवन कुठे अश्राप आहे ?

बोलले "बोलीतले तू शब्द वापर"
लेखणी त्यांची जणू निष्पाप आहे

"गाव तटबंदी असे सारस्वतांचा
आत येण्याची कुणाची टाप आहे ?"

शब्द यवनांचे मुखी असतात त्यांना
वाटते गीर्वाणभाषा ताप आहे

शस्त्र हे येऱ्या-गबाळ्यांना न पेले
'भृंग' कविता शंकराचा चाप आहे