गुंजारव

समजू नकोस भोळी, चवचाल बाग आहे
आमीष सौरभाचे, मतलब पराग आहे

चित्रास श्वेत-श्यामल करडी छटाच शोभे
भरलास रंग तू जो तो रंग डाग आहे

जगण्यास एकसूरी कैसा सरावलो मी
बहुतेक रागिण्यांचे दर्शन महाग आहे

पृथगात्मता जपावी तादात्म्य पावताना
ही सावधानता ह्या हृदयास भाग आहे

सुटणार चिंतनाने नाहीत प्रश्न सारे
हातात शस्त्र घेण्या आम्हास भाग आहे

विस्तीर्ण सागरावर ओवाळ जीव सरिते
निर्झर जयास शोभे मी तो तडाग आहे