गुंजारव

थोडासा पाऊस आयुष्यात पडून गेला
मेघांचा अंश कुशीत वसुंधरेच्या रुजवून गेला
पृथ्वीच्या मिठीत विसावले
वीजेचे लखलखते अधीर पाते
ढग़ांचा रुद्रतांडव ताल समेवर येऊन गेला
थोडासा पाऊस आयुष्यात पडून गेला

त्या वादळाची आवर्तनं
आज पुन्हा अस्वस्थ करू लागली
वैशाखमाती आषाढाची आस धरू लागली
राखेच्या आकांक्षांना नवा कोंब फुटला
तृषार्त क्षेत्राचा पुन्हा तोल सुटला
पानगळीला वसंताचा साक्षात्कार घडून गेला
थोडासा पाऊस आयुष्यात पडून गेला

गंजलेल्या तारांना सौदामिनी छेडू लागली
पेंगुळल्या होमकुंडाला जाग येऊ लागली
विझलेल्या, थिजलेल्या समिधा भगभगू लागल्या
भिजलेल्या मातीच्या गायनाने आसमंत भरून गेला
थोडासा पाऊस आयुष्यात पडून गेला